經營酒窖三違規 貪曾朋友舔到盡

「香港第一貪官」曾蔭權貪腐瀆職，聲名狼藉，而一班「曾朋友」亦唔乾淨得去邊，醜聞之多不相伯仲。嗱，美國總商會前主席詹康信就係人辦嘞！

提到詹氏醜聞，呢幾年大家都聽唔少嘞，太一叮今日同大家講單新鮮啲嘅。件事係咁嘅，詹康信名下公司有間設於防空洞嘅酒窖，前身係英軍軍火庫，屬三級歷史建築，唔知係咪同個「三」字有緣，呢個酒窖被本報踢爆涉嫌「三違規」，三級歷史建築變咗三項違規酒窖，三個政府相關部門展開調查，真係搞笑。

邊三項違規呢？第一，僭建。酒窖嘅露天停車場同玻璃屋違規加建搭建物，人贓並獲斷到正，屋宇署已經發出清拆令。第二，涉嫌無牌經營熟食。酒窖明明以會所形式經營，但就掛羊頭賣狗肉，偷雞招攬街客。第三，涉嫌違反租約。酒窖兼營餐廳，偷偷對外出租作會議場地同婚禮場地。

曾朋友偷雞摸狗，涉嫌違規經營，搞到呢個三級歷史建築物烏煙瘴氣，真係該煨。正所謂，物似主人形，詹康信之前曾被踢爆位於沙田嘅辦公大樓僭建健身室，佢嘅酒窖僭建又有乜出奇吖。話時話，詹康信早就被質疑「曾商勾結」，以曾朋友身份舔盡着數，就以呢個酒窖嚟講，其實都係曾商勾結嘅醜聞嚟o架！

件事要追溯至○三年，當年港府喺未經公開招標之下，擅自將現址租畀詹康信開酒窖。大家知唔知月租幾錢呀？係二千七百蚊，呢個數目租劏房都唔夠啦，唔好話租用酒窖，話無利益輸送，講都無人信喇！

喺輿論壓力之下，當局一○年重新招標，點知結果又係詹康信中標，話就話月租上調到六萬蚊，但始終都係筍價。試諗吓，六萬蚊租三級歷史建築，可以做酒窖，可以做會所，仲可以兼營餐廳，甚至可以僭建添，你話抵唔抵吖。

叮佢個鎯鎯，貪曾搞到官場烏煙瘴氣，香港廉政形象幾乎不保，曾朋友真係功不可沒o架。呢，詹康信用二百萬收購貪曾私藏名酒，同埋貪曾搵詹康信有份嘅運輸公司搬竇，擺明有蠱惑喇。

一句講晒，廉潔係香港嘅基石，絕對唔可以畀貪腐分子逍遙法外。貪曾又好，曾朋友又好，一個都唔可以放過，唔該廉政公署攞啲效率出嚟，咪再拖拖拉拉喇，叮！