政壇：政商定格：郎朗食暈浪丸帆船獻技
「鋼琴王子」郎朗日前喺由中國開往倫敦嘅「歡天藍舵號」帆船上獻技。船上賓客僅得三十人，除咗郎朗爸爸郎國任、郎朗契姐兼港島婦女聯合會主席Carol張雅麗同郎朗音樂學校理事陳妙蘭外，「跳水公主」郭晶晶亦孖住未婚夫霍啟剛同未來老爺霍震霆去聽音樂。
大會本來安排郎朗喺泰晤士河演奏，可惜艘船放咗鋼琴後重到駛唔郁，只好泊喺河邊一個碼頭。不過，船身始終有輕微搖晃，郎朗怕暈船浪令表現失準，開騷前食定暈浪丸，果然冇暈又冇嘔。演奏會上，晶晶同啟剛形影不離，郎朗知道佢哋十一月結婚，親自上前恭賀。聽聞晶晶向來係郎朗粉絲，未知大婚當日，會唔會請郎朗去彈番首結婚進行曲呢？
港協暨奧委會會長霍震霆（右）同郎國任（左）都有上船聽郎朗演奏。
郎朗（左二）喺中國帆船上演奏，契姐張雅麗（左一）、郭晶晶（右二）同未婚夫霍啟剛專程上船打氣。（受訪者提供）