政壇：搞搞政：張學明撐建仔 畀鄉事派逼宮

建仔成員兼新界鄉議局副主席張學明早前接替鄉議局主席劉皇發，出任行政會議成員，同時放棄已做咗八年嘅立法會新界西議席。本身係新界社團聯會（新社聯）榮譽會長嘅張學明，支持兩個來自新社聯、但打正建仔旗號參選立法會嘅候選人。

呢個決定起初冇乜爭議，但鄉事派同建仔喺舊年區議會選舉後全面交惡，再加上喺報名前夕，有建仔候選人去執法部門投訴新界西有「黑金政治」，矛頭直指元朗鄉紳，雙方關係全面破裂，有消息話鄉紳們打算喺十九號誓師大會上向張學明逼宮，要求佢喺建仔同鄉事派中二選一。

唔單止咁，政府決定下屆區會取消委任制，屆時佢唔能夠再以委任議員身份擔任大埔區會主席。有傳張學明想「翻閹」做大埔鄉委會主席，以當然議員身份繼續做區會主席，於是惹來部分鄉紳不滿。事關鄉委會主席向來係排住隊上位，如果忽然有人插隊，即係代表副主席上位無期。

無論點決定都順得哥情失嫂意，究竟佢能否化解危機？鄉事派逼宮行動最終又係咪成事呢？