政壇：譚香文按樓參選撼白鴿

喺○五年政改方案投下關鍵反對票嘅立法會前會計界議員Mandy譚香文，九月捲土重來參加九龍東直選。佢尋日表明對白鴿黨喺一○年支持政改方案好不滿，仲話趁住該黨李華明放棄連任，佢會去該黨九龍東嘅觀塘票倉搶票，目的係要畀泛民支持者有其他選擇，希望殺出一條血路。

Mandy又希望泛民能夠喺九龍東爭取到三席，但就唔包括激進泛民喎。咁就奇喇，九龍東五張泛民名單之中，如果撇除兩張佢口中所謂嘅激進名單，白鴿黨胡志偉有機會當選，但佢又話要去搶白鴿黨啲票，係咪有啲矛盾呢？再者，佢聲稱服務地區十幾年，有實力勝出，毋須「界刂」其他黨派或候選人啲票，究竟佢想表達啲乜呢？

早前有傳同內地關係密切人士想畀錢Mandy參選，但佢一口拒絕，因為估計對方係想泛民互相廝殺，令某啲獨立人士得益。Mandy強調從來冇收過錢，反而係要按咗自己層樓參選。九龍東候選名單仲有謝偉俊、梁家傑、陳鑑林、黃國健、陶君行、黃洋達同嚴鳳至。