政壇：余健志食極唔肥靠跑步
私房菜靚仔廚神Jacky余健志，經常喺社交網站facebook張貼無數美食照，日日係咁食，點解食極都唔肥？佢笑言，保住纖腰係要付出代價嘅，無論幾夜收工、點攰都好，隔日放工後就出街跑步，絕唔偷懶。
原來Jacky仲計劃到上海開設首間內地分店賺人仔。佢話自私房菜開辦以來，生意有增無減，早有北上開分店嘅想法，咁啱上海淮海路正興建新商場，又有意吸納香港品牌打響名堂，於是雙方一拍即合，暫定喺明年初開張。怕唔怕去到咁遠開舖，食物水準會有落差？佢坦言自己冇可能長駐上海，已搵咗信得過嘅師傅上場，佢就負責設計菜式同管理工作，應該問題不大。
余健志話將會小試牛刀，衝出香港到上海開設分店。（資料圖片）