政壇：建行兩副手傳離巢坐正
自從建行前董事長郭樹清升官，做咗中證監主席後，其他管理層都好似有更上一層樓嘅迹象。財新網引述消息話，建行六個副行長，有兩個會調任，一個去信行做行長，一個去政策性銀行做監事長。
話說今次流傳會走嘅，係副行長朱小黃同陳佐夫，兩個都係九十年代就為建行服務嘅「老建行」，聽聞朱小黃會接替信行行長陳小憲，而陳佐夫就好有可能去另一間政策性銀行做監事長。不過，建行發言人就話唔評論市場傳言。
其實朱小黃同陳佐夫喺建行分管個人金融同公司業務，一齊調任都幾大件事。亦有意見話佢哋走咗之後，建行高層變成冇乜嫡系老幹部，因為剩番嘅朱洪波同胡哲一都係近年先入建行，而趙歡同龐秀生就係近年內部新進高層。
朱小黃（左起）、建設銀行董事長王洪章同陳佐夫，早前一同會見傳媒。（資料圖片）