政壇:徐英偉復旦再培訓

據聞政府會喺短期內公布副局長名單,正當大家估緊一眾副局長職位花落誰家時,早前盛傳應徵做文化局副局長嘅民政事務局局長前政治助理Caspar徐英偉就疑似仕途止步。

貪曾喺○八年委任近二十名副局長同政治助理,有政黨背景嘅僅有四個,其中一個就係青年建仔副主席Caspar。綜合各界意見,大部分對佢嘅工作口碑都唔錯,預計佢有機會「升呢」做副局長。事實上,若佢成功獲聘做文化局副局長,有機會同內定做文化局局長、現任民政事務局副局長嘅許曉暉再續前緣合作。

不過,正當大家以為Caspar去向明朗化之際,佢日前自爆喺上月收到上海復旦大學通知,下月十日入讀國際關係與公共行政學院博士課程,又希望喺首學期讀多啲學分,快啲讀完返來陪太太同只有一歲多嘅囝囝喎!

政助命運各異

老實講,特首梁振英提出「五司十四局」架構重組方案,因早前立法會拉布而無法通過,文化局都未開到,所以嚟緊公布嘅副局長名單都唔會有Caspar份。而方案喺下屆重新嚟過嘅話,起碼都要等半年,與其要等,倒不如暫時擲低烏紗帽去自我增值下,到開到局咪重返官場囉,咁都算兩手準備吖!所以佢突然疑似仕途止步,但究竟係故弄玄虛定係韜光養晦,相信只有佢自己至知。

但值得留意嘅係,貪曾委任嘅九名政治助理嘅命途一般都比較坎坷,至今僅得財政司司長前政助葉根銓同教育局前政助楊哲安兩人將會有新工作;相反發展局局長前政助張文韜,原本有意出戰今屆立法會九龍西直選,惟遭到建仔內支部反對而「流產」,或者一切都係時也命也嘞!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白