隱瞞生態災難 膠官禍害地球

驚濤裂岸，捲起千堆雪。大家想見識呢幅赤壁灘頭嘅壯麗奇景，唔使返內地o架，家陣香港就睇到嘞，不過呢，睇完之後唔止唔振奮，仲會好心噏，因為眼前其實係一場觸目驚心嘅生態災難。

話說兩星期前，強颱風韋森特襲港，一艘貨船嘅六個貨櫃被吹咗落海，一百五十噸聚丙烯塑膠粒隨波逐流，遍布本港多個泳灘同魚類養殖場，形成一幅幅「驚濤裂岸，捲起千堆雪」嘅香江奇景。嗱，膠粒拍岸，漫海飄雪，固然係奇景，不過點都奇唔過港府嘅處理手法喎，生態災難發生咗兩個星期，居然一粒聲唔出，隱而不報，直到環保團體揭發，市民自發去沙灘執膠粒，當局先至急急補鑊，膠得佢吖，叮！　

港府高官點補鑊？咪又係嗰套陳腔濫調囉，又話膠粒安全無毒，叫市民唔使擔心；又話已經盡力搶救，撈起咗四、五成墮海膠粒。呢啲咪係真正嘅「膠噏」囉。喂，專家指出，膠粒有吸收毒素能力，可令人致癌同影響心臟健康，萬一魚蝦蟹吞咗再變咗家家戶戶嘅枱上鮮，咁就大件事喇，市民點可以唔擔心呀？港府對事件隱而不報，將市民蒙在鼓裏，又點叫盡力搶救呀？嗱嗱嗱，港府唔好話畀太一叮聽，因為膠粒製造商係一家大型國企，所以要學內地玩封鎖消息呀，咁就罪上加罪喇！

所以話，膠粒污染生態，既係天災，更加係人禍，由於港產官僚闊佬懶理，延誤搶救，令到呢場生態災難愈演愈烈。一名自發去海灘清理膠粒嘅市民係咁講嘅：「香港係我哋嘅家，政府唔做，就靠我哋自己來做。」唉，港產官僚，你哋慚唔慚愧吖！

太一叮有時真係好懷疑，衙門官員嘅腦袋係咪塞滿硬膠粒子，唔識諗嘢。香港海洋生態面臨白色膠災，連魚排都受到影響，市民除咗擔心公眾安全受到威脅，更加關心生態環境遭到嚴重破壞，港府高官九唔搭八，言不及義，反映佢哋平時開口埋口講環保，又係純粹「膠噏」嘅啫。

太一叮提醒反應遲鈍嘅港產官僚，今時今日咁嘅服務態度，係唔得嘅，快快吸取教訓，醒醒定定，如果唔係，下次環保人士發起嘅可能就唔係「清膠大行動」，而係「清膠官大行動」，叮！