政壇：搞搞政：政黨為選舉黐膠粒

臨近立法會選舉，社會議題好容易淪為政黨嘅抽水工具，繼早前嘅國民教育後，近日本港海岸又捲起「岸膠之災」。

十號風球韋森特將一百五十噸膠粒吹晒落海，近日仲沖晒上沙灘，啲政黨喺選舉期間亦好似特別容易受到環保團體感召，好似公文袋、人民力量同社民連尋日都有派員「執膠」，而當中咁啱又會有一個半個立會選舉候選人，新民主同盟雖然下晝有造勢大會，但亦擠出上午時間，八點幾就出發往梅窩執膠粒，仲有感而發以膠粒比喻香港政治，話今次中資公司嘅膠粒「無孔不入滲透」香港，象徵意義非常之大咁話。

白鴿黨可能怕執輸，尋日出海去人煙罕至嘅地方視察膠粒擴散嘅情況，最遠仲去到蒲台島添！佢哋話要政府問責都要講證據，如果唔去睇吓膠粒擴散嘅嚴重程度，齋鬧又好似有啲唔負責任，於是拍埋片影埋相畀相關部門跟進，仲不惜「入侵」海龜生蛋嘅「禁區」。

除直選嘅候選人要攞社會議題抽水外，漁農界功能組別都加入行動，候選人之一嘅經濟動力陳美德尋日就去東灣視察魚排情況，今日仲會去漁護署投訴。建仔見勢色唔對，尋日拿拿臨拉埋幾位候選人，由漁農界候選人何俊賢帶路，視察長洲魚排，唔通真係有水不抽非政客？