政壇：行會成員爭住發言

貪曾出咗名獨裁，唔聽意見，據聞佢喺行政會議仲會不時寸人。班成員話晒粒粒都係猛人，無端端被人寸，點都要顧全吓自己嘅面子，所以只好唔太多聲，講嘢小心啲。怪唔得貪曾話要推行嘅政策大部分都得個講字，連基建項目都推得特別慢啦！

表達意見唔驚被寸

不過，新人事新作風，自從特首CY梁振英上場後，成個行會都唔同咗，例如CY早前話要將行會嘅開會時間延長到下午四點半，初時都搞到人心惶惶o架。但有政界人士透露，雖然CY表面上話要延長會議時間，但暫時都未試過真係開到連晏都冇得食。唯一一次係大家聯誼形式咁食晏，同會議無關。所以，原來CY咁做都只係吸收咗過往做行會召集人嘅經驗，避免啲成員喺星期二中午約咗人食飯，搞到會議尾段趕收工。

另一個改變就係CY開會時唔會好似貪曾咁寸人，亦多數都唔太出聲，虛心聽意見，所以班成員都講得好放心，暢所欲言，連較少講嘢嗰個鄉議局副主席張學明都間唔中發表一、兩句偉論喎。

喺眾多成員之中，據聞最多口水嘅應該係智庫組織「香港黃金五十」創辦人林奮強。佢多口水嘅程度就連一國兩制研究中心總裁張志剛都比唔上，次次開會長篇大論，講個唔停。不過有關人士話，佢又講得幾有見地嘅，有數據又有道理，可惜缺乏咗政治考慮，難以喺香港實行。

咁又會唔會擦出太多火花呢？據聞，喺今屆行會入面有幾位成員都係啲好有主見嘅人，CY、政務司司長林鄭月娥、羅范椒芬同張震遠，佢哋都係啲比較硬幹嘅人，如果傾到啲大政策時，成員太暢所欲言，咪好容易搞到大家變成唔啱嘴形？