經營不善賴打壓 鄭大班變賴大班

「貪曾」曾蔭權一手湊大嘅數碼廣播，開播唔夠一年就宣告即將玩完，成為香港歷史上最短命嘅電台，有「煲呔針」之稱嘅大股東兼台長鄭經翰，機關算盡得個吉，講起真係搞笑！

鄭經翰話喎，因為半數股東拒絕繼續注資，電台營運至九月十一日後結業。本來呢，電台經營不善，生意做唔落去，關門大吉一啲都唔出奇，奇在佢死雞撐飯蓋，居然將責任賴落一眾股東身上，指佢哋係受到中聯辦嘅政治壓力，要封佢咪，先至拒絕注資喎。嘩，雖然鄭大班一向聲大夾惡打橫嚟講，但勢估唔到居然無賴成咁，上綱上線上壞腦，賴天賴地賴政治。

叮！衰就要認，打就要企定。鄭經翰自己經營不善，搞到數碼廣播係咁燒錢，佢唔好好反省，反而不斷要求股東注資，人哋唔縮沙至奇喇。正如有股東話齋，「再係咁燒落去，幾時先完呀？」

仲有吖，數碼廣播先天不足，後天失調，發射設施唔掂，接收效果又差，要擺到窗口至有訊號，聽眾少，前景暗淡，咁嘅蝕本生意要人投資，直頭係靠害啦。而最攞命就係，煲呔針個朵已經臭晒，想搵人落廣告都幾難，想搵人接手更加冇人肯制，唔執笠至奇喇。明明係鄭經翰自己無料，搞到數碼電台好似無底深潭咁，佢仲賴東賴西賴地硬，連政治打壓咁嘅理由都搬埋出嚟，仲有冇離譜啲吖！

你話嘞，如果鄭經翰經營嘅係茶餐廳或者雲吞麵檔，執笠嘅時候，唔通又賴中聯辦政治打壓？鄭大班賴無可賴，自己變咗無賴，不如改名叫賴大班吖，笨！

唉，無計喇，香港社會愈來愈政治化，愈來愈畸形，黑白顛倒，是非不分，好似鄭大班呢類聲大夾惡、妖言惑眾嘅跳樑小丑，簡直通街都係。

大家都知，香港回歸後烏煙瘴氣，亂象叢生，就係因為反中亂港傳媒同各路牛鬼蛇神不斷煽風點火，搞風搞雨，好似國民教育咁，佢哋話係洗腦就係洗腦，根本有佢講冇你講。其實，如果國民教育係洗腦，咁鄭經翰不斷妖言惑眾，反中亂港傳媒日日散播白色恐怖，豈不是比洗腦更加恐怖，叮！