政壇：Sun人論壇：脫班問題何時了

九巴作為公營交通機構，仲係全港最大嘅巴士公司，年年賺到笑，理所當然要提供最好嘅服務畀市民。佢哋自己嘅服務宗旨都講明，要提供有效率、可靠、友善同超值嘅巴士服務。但係觀乎佢哋近年嚟嘅表現，似乎同上述目標差天共地喎。

講緊嘅咪就係佢哋嘅脫班問題囉。去年度九巴嘅脫班率高達百分之七點二，冠絕全港，搞到運房局都要發出「最後通牒」，如果唔改善脫班情況，分分鐘要承擔法律後果。試想想，小市民做咗成日，放工無非都係想快啲返屋企啫，點知等嚟等去都無車，嗰種心情會係幾咁無奈呢？

除咗脫班之外，九巴嘅誤點問題亦都令人難以接受。之前有政黨調查過黃大仙區內嘅巴士行駛情況，發現喺黃大仙區行駛嘅九巴唔單止全部都有誤點，仲可以遲成一倍時間，足足要乘客等成三十分鐘！打工仔就算預早咗出門口，竟然因為你九巴而遲到，最後搞到佢都遲埋，冤哉枉也！仲講咩效率可靠吖！

咁都未算衰，眼見脫班問題嚴重，九巴居然唔係諗計解決，反而用埋晒啲旁門左道去欺騙市民。早前就畀傳媒踢爆佢哋搵幾架外線車篤數，偷偷摸摸行幾個站拉番低脫班率。虧得九巴厚面皮話脫班率已經大幅回落，仲話係公司努力同招聘嘅成果喎。有錯不認，有弊不杜，呢啲算係呢門子大企業嘅風範呀？又談何用「友善」嘅態度服務市民呀？

服務差之餘，仲要年年加價。好似上年咁，就已經加咗百分之三點六。最吹脹嘅係九巴話過之所以脫班，主因係唔夠車長，所以要請番多啲人手，但轉過頭又話請人會令佢哋有加價壓力，嚟緊會考慮使唔使加價。準時開車明明係基本責任，點解依家搞到好似唔想你脫班，市民就要畀貴啲咁先？仲好意思講咩「超值」？

講真吖，香港人口持續增長，多個地區都相繼發展。九巴早就應該好好檢討現時嘅行車路線、班次同埋車站位置等等能唔能夠照顧到實際嘅情況。如果發現有未覆蓋到嘅地區就要即刻改善。好似港鐵咁，都一直擴充緊鐵路線啦！點解港鐵會畀到人四通八達嘅感覺，但係九巴就成日好似又唔準時車站又吊腳咁吖？咪就係因為故步自封，只見到眼前利益而無聆聽市民嘅苦況囉！

九巴自己訂立嘅四大目標無一樣做到，試問又點對得住廣大市民呢？如果再無改善，重蹈覆轍，小心一七年之後專營權不保呀！

本欄逢星期日見刊。園地公開，歡迎就時事局勢發表意見。請附上個人資料，電郵至sunmanforum@gmail.com