政壇：搞搞政：仁濟主席入黨變葉劉金主

新民黨成立咗唔夠兩年，已經成為建制派一股新興勢力。為咗多幾條大水喉射住，近日有消息話新民黨誠邀仁濟醫院主席鄭承隆入黨，仲有意開多個副主席畀佢做添。

新民黨其實財力有限，據聞該黨最大金主係主席葉劉淑儀自己，所以有傳葉劉最近搵咗做翡翠買賣起家嘅鄭承隆入黨，希望呢支大水喉射住新民黨，喺選戰期間發揮作用。咁啱鄭承隆做咗慈善公益好多年，想嘗試喺政界發展，兩人「郎情妾意」，一拍即合。

政界流傳兩種講法，一係鄭承隆嘅入黨要求係要做副主席，一講係新民黨為咗吸引佢入黨，特別加開多個副主席位畀佢做。我哋問過葉劉，佢承認有位仁濟醫院頭頭入黨，至於係咪做副主席，就要問過黨中委嘞！不過，聽聞黨中有人頗有微言，覺得鄭承隆冇乜從政經驗，冇理由新丁即做副主席喎。

翻查資料，鄭承隆由○四年開始加入仁濟醫院董事局，到○八年升至副主席，今年四月出任主席，從政經驗唔多，只係喺去年底參加過特首選舉委員會社福界別選舉，但低票落敗，如今佢想加入政黨，決心同野心都唔細喎。