政壇：葉維晉診所展覽那話兒

有「泌尿科聖手」之稱嘅前廣華醫院外科部主管葉維晉（Andrew），自立門戶搵真銀，佢位於中環嘅診所尋日開張大吉，城中名醫紛到賀，除咗名醫陳曦齡外，就連近日忙到極嘅食物及衞生局局長高永文，都以老同學身份撐場。男士到中年少不免經歷「男人之苦」，高永文都自嘲要搵Andrew排定隊檢查，仲要求縮短輪候時間喎。

高永文同Andrew相識三十六載，七六年齊齊入港大，當年同班同學仲有港大微生物學系講座教授袁國勇，三人連做功課都話要同一組，friend過打Band。講番Andrew間診所有千幾呎，布置夠獨特，最矚目係特別整咗個玻璃飾櫃擺放陽具精品，有玉製，亦有石雕款式，總之花款多多，通通都係佢暢遊大江南北時搜羅回來。貴唔貴？Andrew笑言價錢合理。連收藏嗜好都離不開男人「那話兒」，唔通係職業病？