政壇：泛民九東自殘茅招插謝偉俊

今屆立法會選舉泛民主派喺五區直選都爆發內訌，九龍東只得五個議席，但泛民竟派足五張名單參選，自己人搶自己票，最後一席隨時落入建制派口袋，都唔知話佢哋大貪定係戇居好。不過尋日佢哋出席電台選舉論壇時，就出奇地團結對外，齊齊濫用規程，圍攻建制派謝偉俊（阿Paul）。

今屆選舉多區都有超過十條名單參選，為咗公平起見，電台特別安排以抽籤方式，決定候選人互片環節嘅提問同回答隊伍。其中阿Paul就抽中由民建聯陳鑑林名單嘅黎榮浩提問，黎榮浩見大家都係建制派，自然高抬貴手，淨係問民生議題。當阿Paul以為自己執到寶之際，本應冇份講嘢嘅白鴿黨胡志偉，竟公然違規中途插嘴，質疑阿Paul點解由旅遊界功能界別空降九東參選。

黑面拒接錦旗快閃

幾名泛民候選人互質時，又好有默契咁集體違規，圍攻阿Paul。公文袋袋巾傑本來抽到質詢佢嘅前黨友、自稱獨立泛民嘅譚香文（Mandy），但佢不單冇質問Mandy，反而問人覺唔覺阿Paul係向西環借票、係假獨立。Mandy立即乘勢話擔心阿Paul聲稱專業獨立，其實就係保駕護航嘅建制派。

輪到人民力量黃洋達質詢袋巾傑，佢又話唔明點解阿Paul身為律師，都會支持就雙非問題提請人大釋法，阿Paul只得啞忍。

唯一無喺問答環節揶揄阿Paul嘅社民連陶君行，更喺論壇完結時送咗一面「西環之子、精忠報黨」嘅錦旗畀佢，令阿Paul當堂黑面，拒接離開。不過話說回來，阿Paul尋晚喺黃大仙舉行造勢大會，邀得全國政協王國強、王惠貞、周安達源、以及做過中聯辦嘅區議員黃春平出席，撐場陣營仲猛過唔少根正苗紅嘅建制派人士，佢話自己唔係西環力撐，真係好難令人相信囉！

參選九東嘅仲有工聯會黃國健同獨立嚴鳳至名單，但兩人尋日都冇出席論壇。