毒霧連日罩維港 污染之都臭名揚

香港空氣質素惡劣，夏天不嬲又熱又焗，大家早就見怪不怪，之不過，呢幾日情況更加惡劣，氣溫同空氣污染都近乎爆燈，簡直難頂。話就話近日嘅天氣主要受到颱風「蘇拉」外圍下沉氣流影響，但如果唔係香港本身空氣質素有問題，又點會搞到毒氣罩維港吖。叮，再咁落去，香港人遲早出街都要戴氧氣罩先得！

呢，連日來維港一帶嘅能見度得嗰五千米左右，望過去白蒙蒙一片，像霧又像花，非霧又非花，可惜一啲詩意都冇。以中環為例，日前錄得二百一十二嘅空氣污染指數，達到最高級別嘅嚴重水平，僅僅低過二○○○年內地沙塵暴襲港咋，陰功。點解市區嘅空氣污染咁嚴重？無他嘅，人多車多樓又多，廢氣吹唔散，焗吓焗吓，咪焗成一個大溫室……唔係，係大毒氣室至啱。

正所謂，好事不出門，醜事傳千里。香港空氣污染持續爆燈，居然成為國際新聞，簡直丟晒架。《華爾街日報》報道，好多香港人出街都要以手掩面而行，仲話香港已經成為中國第二嚴重空氣污染嘅城市。唉，港府仲話要吸納優秀人才添，咁嘅空氣質素係人都怕怕喇，點吸納喎！

咁啱得咁蹺嘅係，正當毒氣罩維港之際，撞正聽日係「全民運動日」，都唔知係攞景定贈興。正如醫生話齋，空氣污染咁嚴重，長者、幼童同埋病患都唔應該喺戶外做運動。係咯，健康要緊，萬一為咗響應「全民運動日」而有乜冬瓜豆腐，咁就弄巧反拙嘞，康文署實在有必要提醒市民，做運動最緊要量力而為，千祈唔好勉強吖。

講開又講，空氣污染係香港老大難嘅問題，港府誓神劈願承諾改善，仲話要換回藍天白雲添，可惜全部得個講字，最叻就係搞咗個不知所謂嘅停車熄匙。咁多年來，話之你環保團體日嘈夜嘈，話之你市民日鬧夜鬧，當局一於闊佬懶理，拖得就拖。嗱，淨係檢討空氣質素指標咋，一拖就拖咗N年，依家香港仲係用緊二十幾年前嘅指標，你話係咪搞笑吖！

無論點都好喇，香港淪為污染之都，唔止有損國際形象，而且有損港人健康，唔該港府盡快諗辦法改善，如果唔係，遲早搞到人人戴氧氣罩出街，大家都冇面見人，咁就真係該煨囉，叮！