政壇：政商定格：鼠王芬選舉Rap歌等惡搞

立法會選舉候選人各出奇謀拉票，競逐連任九龍西議席嘅西九新動力梁美芬（鼠王芬）都搞搞新意思，將會推出Rap歌《快樂西九》，可惜首歌不斷重複「美芬加油、堅守西九」兩句，我哋聽一次已經畀首歌洗腦咁滯。不過，首歌暫時唔會擺上網，唔通鼠王芬怕被「二次創作」愛好者惡搞？點知佢話：「惡搞咪即係受歡迎囉！」睇嚟鼠王芬已經冇以前咁睇唔開喇喎！

鼠王芬自爆之前立法會拉布期間，開會開到悶悶哋，就諗吓選舉宣傳策略，就咁畀佢諗到唱歌仔。為呢首《快樂西九》作曲嘅係創作《小明上廣州》嘅韋然，而歌詞就係鼠王芬親自填嘅，唔怪得歌詞連佢處理過鼠患都寫埋啦。第一次Rap歌嘅鼠王芬話，首歌錄咗足足三個鐘，諗住擺街站嗌咪嗌到攰時可以播吓喎。經常話幫街坊處理噪音問題嘅鼠王芬，唔知到時會唔會畀人投訴製造噪音呢？參選九龍西直選嘅名單仲有黃碧雲、毛孟靜、蔣麗芸、黃毓民、黃以謙、譚國僑、黃逸旭、林依麗。