政壇：搞搞政：工總兩巨頭撐住蘇家碧

自從爆出前房屋及規劃地政局常秘梁展文轉職商界涉嫌利益衝突後，公務員事務局往後審批退休高官離職再就業申請時，一切都揸正嚟做，連過檔非商業機構都冇得傾，無辜令工業總會（工總）成為苦主。話說前商務及經濟發展局副秘書長蘇家碧（Linda）七月初加盟工總，原本諗住接替已離任嘅CEO邱達宏，點知Linda嘅兩年再就業冷河期仲未過，唔可以從事同政府及外界接觸嘅工作，於是乎屈就做住總經理，工總嘅對外工作要由主席鍾志平（Roy）同副主席劉展灝（Stanley）撐住先。

「電鑽大王」阿Roy同鐘錶業老行尊Stanley都係大忙人，要佢哋變相幫Linda打半份工，認真有啲為難。不過，兩位大男人都好體貼，已疊埋心水做好呢份替工。Stanley話，佢同阿Roy已夾好晒未來幾個月嘅行程，兩人唔會同時離港公幹，仲話可以趁機會學嘢添！阿Roy就笑稱，「署理CEO」得來不易，其他人咪使旨意搶咗呢份工喎。咁又係，佢哋可能已經創造歷史，成為工總成立逾半世紀以嚟，首宗第一、二把手輪更兼做CEO案例。