政壇：超級議席抽8字頭冧巴
立法會選戰展開，一班選舉候選人同代理人尋日去抽籤決定選舉名單嘅排名次序，例如參選超級區議會議席，名單號碼就係「8」字開頭，由801至807號，發發聲，啱晒中國人講意頭，而且個個都話自己個冧巴好。好似民協馮檢基抽到嘅「805」號，佢就話要爭取超級議席第五個席位，又認為自己個冧巴好易記。至於建仔劉江華抽到「804」號，佢就話排中間都唔錯，叫啲選民蓋印蓋正中間就得喎。
白鴿仔鐵頭仁同涂謹申孖住上抽到「801」同「802」頭兩個號碼，睇落兩個冧巴好似易記啲，但鐵頭仁就話唔信彩數喎。建仔李慧琼就抽到「806」號，而工聯會陳婉嫻就包尾抽到「807」號，但嫻姐話選民係睇候選人做唔做到嘢嘅，所以咩冧巴都冇所謂喎！另外，白韻琹抽到「803」號。