政壇：CY唔收禮洗煲呔曾貪風

貪曾貪得無厭，在任特首時除入住超豪總統套房外，仲留咗唔少公務禮物據為己有。不過，貪曾呢啲貪腐衰氣已過，新特首梁振英（CY）連未上任時收到嘅禮物都一一申報，仲上載到特首辦網頁供公眾閱覽，而連月嚟收到超過十九份禮物，CY一份都冇保留自用。

貪曾幾乎全據為己有

特首辦最新公布嘅六月份候任行政長官獲贈禮物名冊，顯示CY收咗多份禮物，包括禮包一個、茶葉一盒、金色擺設一件、兩條領呔、圖畫一幅、花籃兩個、印章、水晶擺設、圖畫同一套書等，全部都係估值四百蚊或以上嘅禮物。CY早前成日落區出席公開活動，可能係啲活動主辦單位或粉絲送畀佢都未定。

反觀貪曾，在任時就曾收過好多貴價茅台酒、葵花雞同蛋、大閘蟹、菜心、新鮮魚等，連跑步機都有，幾乎全部據為己有，真係貪得無厭，難怪佢卸任後要租用貨倉先至擺得晒啲禮物。