政壇：孫穎難忘童年血指練琵琶

喺呢個幸福時代，如果話小朋友學樂器要學到出血嘅話，相信好多家長聽到都會嚇呆。有「鋼琴公主」之稱嘅孫穎，四歲開始學鋼琴，七歲開始學琵琶，正所謂「台下十年功」，要學好一門手藝絕不簡單，所以當年佢喺孫爸爸督促下，每日要彈四個鐘琵琶，真係一刻都冇放鬆，仲彈到手指頭都流血，方能掌握琵琶嘅入門技巧。

國寶級鋼琴大師劉詩昆前晚喺尖沙咀文化中心舉行第十屆香港少年兒童鋼琴大賽頒獎禮，孫穎呢位大師姐當然要到場支持師傅啦，除咗擔任頒獎嘉賓，仲即場表演，喺參賽者前盡顯功架。

頒獎禮前，見到仁愛堂總理張瑋傑伉儷帶埋四歲囡囡Tisha提前入場，原來Tisha係劉詩昆徒孫，早幾個月孫穎喺一個慈善舞會上見到Tisha係可造之材，於是穿針引線締結師徒緣分。張太大讚劉詩昆好關心學生，就算假日都會去了解學生學習進度。雖然Tisha只係拜咗師三個月，但張太對囡囡可發揮音樂才華已好滿足，今次仲特登攞埋自己本新書嚟送畀孫穎，答謝佢呢位伯樂。