政壇：湯顯明陰魂不散

仲以為貪曾集團會隨住政府喺七一換屆之後會從此消失，點知喺上個月二十七號刊登嘅憲報，竟然仲見到湯顯明個名，真係陰魂不散，畀佢嚇到打咗個突！

當日憲報嘅內容大致係話，廉政專員「湯顯明」授權執行處處長李寶蘭喺七月二十一日至二十三日期間，署任廉署執行處首長嘅職責，但署名就寫番正係白韞六，政府憲報尋日作出更正。

署任安排有漏洞

據了解，今次出錯係因為廉政公署人員嘅手民之誤，但英文版就寫啱咗；咁點解新任執行處首長黃世照喺七月十九號上任幾日就要搵人署任？咪因為佢喺退休期間突然接到政府急call，邀請佢出任呢個位囉，所以仲有好多私人事務要處理，要喺七月二十三日（禮拜一）放一日假，而廉署就安排李寶蘭署任埋之前嘅禮拜六、日，以為咁就萬無一失。

法律界人士黃國桐話，呢啲錯誤可大可小，皆因如果嗰幾日署任人行使咗一啲權力，好似酌情權咁，又或者簽署一啲有關調查嘅文件，被調查人士可能會挑戰廉署，話呢啲決定係冇法律效力嘅，雖然發生嘅機會係微啲，但唔係話冇可能。

講番湯顯明，佢係貪曾愛將係人都知，所以○九年屆六十歲退休之齡，靜靜雞獲延任至今年六月底，同貪曾齊齊退落嚟，點知好衰唔衰，貪曾畀人發現佢計劃以每月八萬蚊，平租有深圳王之稱嘅黃楚標位於深圳東海花園嘅豪宅單位，而黃楚標又係湯顯明嘅高爾夫球嘅波友，關係千絲萬縷，所以湯顯明喺廉署調查貪曾時要避席，而佢離任前又密會貪曾，搞到最終要出嚟解畫！

而自從七一之後，湯顯明好似人間蒸發咁，一直唔見佢蹤影，唔似得貪曾咁，去到加拿大咁遠都畀人影到，所以話做人千祈唔好做衰嘢，如果唔係去到邊都會畀人發現！