泳客安全大過天 人手爭拗放一邊

夏日炎炎，加上奧運熱潮，睇住各國游泳健兒嘅英姿，好多人自不然想暢泳一番。嗱，嚟緊星期日係「全民運動日」，康文署轄下大部分游泳場館免費開放，就係暢泳嘅好時機喇。不過咁，暢泳還暢泳，太一叮想提醒一句，當日隨時無足夠救生員當值，就算夠人，都可能係臨時「拉伕」而來，閣下落水之前最緊要先考慮自己嘅安全吖。

港九拯溺員工會話，救生員嘅人手一向唔夠，依家康文署仲要搞「全民運動日」，到時泳客如鯽，隨時應付唔嚟喎。其實，工會之前已經同康文署多番談判，要求請多四百個救生員，但康文署只肯請多四十個，雙方雞同鴨講，最終談判破裂，工會索性發起罷工，希望逼康文署跪低。點知你有張良計，佢有過牆梯，康文署以時薪六十三元急聘二百幾名臨時救生員頂檔，搞到工會嬲上加嬲，批評署方以訓練不足、經驗唔夠嘅臨時救生員當值，罔顧泳客安全。

話時話，拯溺工會嘅批評都唔係冇道理o架。康文署轄下救生員喺正式當值之前，必須先接受幾日培訓，了解工作環境後至可以投入工作，依家康文署病急亂投醫，請二百幾個臨時救生員頂檔，萬一真係有突發事故，佢哋應唔應付得嚟？呢，今次有位應徵者竟然只得十六歲，真係講都冇人信。

冰凍三尺，非一日之寒。康文署同救生員之間嘅爭端已非一朝一夕，自從○四年康文署大幅削減救生員之後，雙方就不斷為人手不足嘅問題爭拗。拯溺工會指依家每個標準池只得三人當值，根本唔符合國際標準嘅至少四人，令同事做得好辛苦；而康文署就話請人唔係一時三刻嘅事，涉及好多嘢，要慢慢嚟喎。如是者，雙方幾乎年年嘈，工會耐唔耐就搞罷工，市民煩不勝煩。

計太一叮話齋，咁樣鬥法，最終只會演變成康文署、救生員同市民三輸嘅局面。康文署一味見招拆招，從來無嘗試從根本上解決問題，固然暴露咗官僚作風；而工會雖然理直氣壯爭取正當權益，但呢種以泳客安危作為籌碼嘅行為，亦令唔少人反感。試諗吓，值此炎炎夏日，當泳客想開開心心暢泳一番，點知隨時可能乘興而去，敗興而回，你話幾無癮呢？

所以話，相嗌唔好口，唔該康文署及救生員坐低慢慢傾，唔掂傾到掂，千祈咪攞泳客安全嚟較飛呀！