政壇：搞搞政：發叔為啖氣唔接西環call

立法會新界東直選共有二十張名單競逐九個議席，當中建制派亦鬼打鬼。據聞西環有關人員喺本周二選舉提名期最後一日，盡最後努力要求鄉議局主席劉皇發令鄉事派兼經濟動力代表邱榮光退選。發叔平時好聽話，但今次竟然聽完首個電話嘅來意後就再冇接聽之後嘅電話，仲飛埋去泰國度假添！我哋先後多次嘗試聯絡佢，但電話一直長響冇人聽。

發叔今次派人搶票，據聞係新仇舊恨共冶一爐，除被迫放棄行政會議成員一職同新界村屋僭建風波外，有傳仲要佢交出立法會鄉議局功能界別議席。唔單止咁，政府七月授勳時，據講發叔提名嘅名單亦全面被封殺，加上有人事事偏袒建仔，結果出現咁嘅局面。

據聞派人參選只係報復嘅第一波，新界東鄉事派嚟緊會成立一個寮屋關注組，致力開拓寮屋居民嘅票源，有鄉事中人講明就算贏唔到，都要搵一個半個西環祝福嘅候選人「陪葬」。

參選新界東仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、陳克勤、葛珮帆、梁國雄、龐愛蘭、何民傑、梁安琪、方國珊、龐一鳴、徐家傑同陳國強名單。