政壇：政商定格：獅城潘燕明做港星展老總
自從Linda王潔鳳離開星展香港過檔平保後，佢哋零售銀行業務總監個位就懸空咗近兩個月，依家終於有新消息，星展將會由大本營新加坡調任Pearlyn潘燕明嚟香港，出任星展香港董事總經理兼零售銀行業務總監，仲會喺下星期上任。
大家可能覺得Pearlyn好熟口面，因為佢真係好勤力，上個月星展喺又一城開分行時，當時仍未上任嘅佢已嚟咗香港，仲親自落去分行度出席開幕儀式，順便熟習環境同認識新同事添！
其實Pearlyn都算係星展嘅老臣子，○三年就加入星展，調任香港之前係星展豐盛理財嘅區域主管，喺零售同埋財富管理業務方面有多年經驗。聽講佢仲識講少少普通話同廣東話，相信唔使幾耐，佢嘅廣東話一定會進步神速。
星展香港董事總經理兼零售銀行業務總監潘燕明將會喺下星期正式上任新職位。