政壇：鄭錦鐘兄弟團睇冰川擦蟹

保良局副主席Eric鄭錦鐘啱啱放完「寒假」返嚟。寒假？講緊嘅係Eric搞咗個鄭氏兄弟睇冰團，同太太、兩個妹同細佬四家人坐豪華郵輪去阿拉斯加，重點節目就係去睇冰川。睇住十層樓高嘅冰川瞬間墜落，蔚為奇觀，令人驚嘆大自然威力。

睇完咁震撼嘅自然景象，食物當然都要一樣震撼味蕾先叫完美，除咗品嘗鮮味到極嘅阿拉斯加皇帝蟹外，仲有一種體積較小嘅Dungeness Crab（黃金蟹），味道鮮甜無比，好味到Eric要搬一箱返港做手信。

原來咁多年來佢都未試過同弟妹去旅行，所以今次旅程別具意義。郵輪上嘅設備齊全，照顧晒各人需要。鄭太最欣賞每日黃昏，服務員開床時，會好有心機咁用毛巾摺出可愛嘅動物，好似龍蝦、魷魚等海鮮，仲出咗本書教授摺疊技巧，難怪Eric太太都忍唔住買咗本書，諗住返香港同孫仔一齊玩。