政壇：鐵頭仁寸司馬文被鬧爆
南區區議員司馬文因為不獲公文袋支持參選立法會超級區議會議席，搞到憤而退黨，最慘係最後都攞唔夠十五個提名參選。盛傳同公文袋大搞密室政治嘅白鴿黨「鐵頭仁」何俊仁尋日就喺電台節目上話，聲稱該黨嘅區議員其實好願意畀提名司馬文嘅，但係司馬文冇搵佢哋幫手喎。白鴿黨同公文袋搞「地下情」阻人參選，依家鐵頭仁仲喺度講風涼話，抵佢畀聽眾連環鬧爆。
鐵頭仁畀幾個聽眾鬧爆兼要佢下台，其中一個聽眾批評白鴿黨前年搞政改方案搞咗個超級議席出嚟，但門檻又定得太高，先搞到司馬文選唔到。又有聽眾鬧白鴿黨，話佢哋有份通過政改方案令立法會嘅否決權要由二十席加到二十四席，直斥「如果泛民今次選舉失利，攞唔到二十四席，你同劉慧卿係咪會引咎下台？」點知鐵頭仁就耍手擰頭話唔關佢事，仲邀功話佢哋爭取多五席地區直選添！