政壇：嫻姐環保拉票廚餘耕田
眾所周知，特首CY梁振英支持善用廚餘，仲身體力行用廚餘做肥料。參選立法會超級區議會議席嘅工聯會陳婉嫻亦食住條水，尋日搞咗個同廚餘有關嘅活動，拉埋新界東參選人葉偉明入上水用廚餘轉化成嘅肥料耕田，睇落都有板有眼。
嫻姐話呢種肥料種出嚟嘅蔬菜好有益，對於好似佢呢類癌症康復者相當唔錯，佢又話選舉後會邀請CY一齊耕種，亦希望佢發展呢項產業，增加就業機會喎。
嫻姐喺烈日之下玩到忘形，同事不斷叫佢抖抖，點知佢係都要耕埋先肯走。話說兩人翻土期間，葉偉明差啲挖中條蚯蚓，嫻姐即時喝止，話蚯蚓可以翻鬆泥土，嚇到葉偉明郁都唔敢郁，認真搞笑。參選超級議席嘅仲有何俊仁、涂謹申、劉江華、李慧琼、白韻琹名單。
陳婉嫻（右）同葉偉明（左）尋日齊齊玩耕田。