SUN世代：洋服店再放異彩

六十年前，香港正逐步步出戰爭的陰霾，張宗豪（Lincoln）的父親亦決定，與兄長開展洋服生意，為客人度身訂製恤衫西褲。經歷多年風雨，生意傳至Lincoln手上，時光已變，世界亦變，但他依然堅持以一針一線，為客人縫出最合身的關懷，延續這種港人曾經引以為傲的手藝。

小時候，Lincoln最愛拿布卷中的木筒當雙截棍玩，在西服店中跑來跑去；父親則坐在一旁專心工作，熟練地操作着衣車。不消一會兒，一套小恤衫西褲就做了出來，「一年級嗰陣，我腰圍已經有成三十四吋，喺校服舖根本買唔到啱身嘅衫，爸爸就索性幫我度身造。」

慈父手中線，Lincoln穿在身上，自然倍感稱身。雖然自小便受惠於父親的生意，他卻從未有過繼承家業的打算，亦從未學習過任何做衫技術，「度身、畫紙辦乜都唔識，後來我去咗加拿大讀書，大學亦都係選修經濟。」

初學做衫長短袖

畢業後，他在加國工作了一、兩年，卻苦苦找不到方向，「咁啱媽媽打電話嚟，話爸爸身體轉差，於是我就決定返嚟幫手。」回到那熟悉的地方，Lincoln發現，父親過往駕輕就熟的事，原來困難非常，他惟有向八十多歲的老師傅求教，來個縫紉「車牌」速成班，「我喺半年內，學晒人哋用四、五年學嘅嘢。做出嚟嘅衫，左袖比右袖長，又成件針窿，完全唔見得人！」

對縫紉技術算是有了「基本」知識，Lincoln就轉從設計入手，希望為洋服店帶來新元素，「我哋一向以手工為賣點，設計來來去去都係嗰幾款，於是我就另闢品牌，主打更時尚嘅洋服，仲開始設計埋女裝。」他從不同時裝雜誌尋求靈感，設計出更具玩味的男女服飾，新產品推出市面後，反應甚佳，更為新品牌打響名堂。

以品質留住客人

平地一聲雷，讓Lincoln更心雄，認為女裝市場大有可為，決意大搞，除推出更多大膽設計，還找工廠大量生產，結果卻是焦頭爛額，「工廠做出嚟個量太大，我哋得兩間舖，根本負荷唔到，加上部分設計走過咗龍，連原本啲客都接受唔到，唔幫襯我哋。」經此一役，他決定還原基本步，雖仍主打玩味較重的服飾，卻貴精不貴多，務求以高品質留住客人。

新品牌做得有聲有色，舊品牌又如何？Lincoln希望，能保留老店原有特色，繼續為客人做出最稱身、最合心的洋服，「舊式嘅洋服店，執嘅執，轉型嘅轉型，所餘無幾。我哋一定會堅持人手製造，將呢份咁值得香港人驕傲嘅手藝，一直承傳落去。」

Lincoln's Profile

婚姻狀況：已婚，育有一子

現　　職：tcny總經理、新星有限公司經理

公　　職：香港上海總會理事、滬港文化交流協會聯絡處處長、香港奉化聯誼會常務理事

興　　趣：吹色士風、打網球