SUN微博：打橫嚟講：唧都唔笑的新局長

恭喜！恭喜！恭喜陳茂波前議員，由今日起，唔使再做雙失中年，可名正言順做官大人矣！雖然，此職位乃執二攤，着舊鞋，但總好過踎躉，呆在家裏等運到吖！

陳局長話自己唔會視發展局局長為「臨時工」，噢！祝你一世做落去囉！喂！係咪有副司長都唔做先？做人要講口齒呀！信你o架！

陳局長向梁振英特首宣誓效忠後，出來見記者的神氣，令人諗起愛國大詩人屈原，嗱！唔係話佢識吟詩，或咒佢跳江自盡呀！而係佢個樣由頭到尾，唧都唔笑，好憂心忡忡貌，成件憂國憂民嘅苦瓜乾咁款，家有要事乎？

呢件新局長誓言旦旦，話佢會懂得處理好新界村屋同其他僭建問題喎！哦！記住先？

被質疑缺乏土地規劃經驗時，這位陳局長即時反駁，話自己曾於兩建築房地產公司任職喎！好彩！但那個喺立法會內洗廁所嘅阿叔，咪大有機會做主席囉！陳局長話口未完，卻被傳媒揭發佢曾改裝名下單位做劏房出租牟利，佢真靈巧，透過發展局回覆，卸落老婆嗰度去！

唉！未正式開工，已有是非醜聞纏身，點解唔事前清洗漂白至埋位呀？咁！又只會令梁振英政府更煩更亂也！

嗱！陳局長，你咪以為新界人同地產佬最難應付呀！除佢哋外，環保分子也不會放過你呀！一棵大樹倒冧前，睇你企得幾耐！祝你好運啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot