政壇：政商定格：李文俊瞓紙廠唔瞓豪宅
最近日本王子造紙廠喺中國江蘇啟東嘅排污渠項目，因為遇到當地居民抗議，搞到要停工，事件餘波未了。內地紙業「二哥」理文造紙尋日開股東會，記者捉住理紙CEO Raymond李文俊傾吓，睇吓佢擔唔擔心遇到類似情況。
Raymond就話理紙喺環保方面一向做得好好，所以一啲都唔驚，仲話隨時歡迎有關當局去睇，佢更加話自己都住喺間廠入面，有乜嘢事第一個死係佢，唔似其他人咁「間廠就喺度，佢就住喺第二度」，所以可以保證係絕對冇問題，仲叫記者得閒上去參觀吓添！
咦！佢咁講似乎係對王子踩多兩腳，暗寸佢哋人就喺日本，但啲廠就喺中國，諗住眼不見為乾淨喎！不過，今時今日有豪宅唔住，同員工一齊住廠嘅老細真係唔多，唔怪得理紙盤生意逆市都做得唔錯啦！
李文俊強調自己公司嘅環保做得好好，歡迎有關當局隨時去睇。