政壇：政商定格：鄭錦鐘左手掂唔到膊頭
早前見到身兼道路安全宣傳運動主席嘅保良局副主席Eric鄭錦鐘，佢自爆係單車意外受害者，至今猶有餘悸。
話說讀緊小學四年級時，佢已經好鍾意踩單車，不時租車喺大坑東足球場踩番幾轉。有次佢租咗架單車，座位太高，但佢又懶得校低，最後搞到失平衡翻車。初時佢以為只係好小事，點知一起身，發覺左手吊吊揈，原來係甩咗骹，返到屋企畀阿媽鬧餐飽之後，拿拿聲去睇跌打，至今隻手都唔能夠完全屈曲，掂唔到自己膊頭。
Eric話最常見嘅單車意外，並唔係同汽車相撞，而係自己落斜時失控「攬樹」受傷，起因係駕駛者防禦裝備不足，又冇定期檢查煞車裝置，所以佢以過來人身份呼籲大家，唔好忽視單車安全，以免樂極生悲。
鄭錦鐘（前）自爆小時因踩單車跌傷甩骹，至今仍有後遺症。（受訪者提供）