政壇：搞搞政：阿涂被翻中學舊帳
呢排政界興翻舊帳，發展局前局長麥齊光被揭二十幾年前涉嫌騙取租津，最終搞到落台收場；報咗名參選區議會超級議席嘅白鴿仔涂謹申，近日亦被翻逾三十年前嘅舊帳。
署名「九華校友」嘅人投訴阿涂，話佢讀中四做九龍華仁郵學會副會長時盜用會費；到中六做學生會會長時，再因帳目不清，做唔夠半年就極速落台，破晒該校紀錄。但當年九華神父出名仁慈，至幫佢寫推薦信保送入港大讀法律。
問番阿涂有冇發生過咁嘅事，佢聽到後即刻笑咗出嚟，話呢位「校友」每逢選舉年就會寫信投訴佢，已經唔係第一次聽到。佢話郵學會同學生會都設有司庫，盜用會費咁大件事又點會冇人知呢？佢仲話最好笑係九華神父當年根本冇幫佢寫推薦信，證明呢位校友噏得就噏。佢估計呢位校友隔咗三十年都記住呢啲事，當年一定同佢有過節。
設計圖片及對白