政壇：保釣出位示威殃及池魚
保釣行動委員會尋日趁行政會議開會，再度去特首辦請願，要求政府解除對保釣船駛離香港水域嘅禁制令。佢哋一行七人晨咁早到咗特首辦門口，不但拒入示威區，仲將幅橫額掛喺車閘上面，等到攰攰哋更坐埋喺車路，嚇到班警察同保安大為緊張，相當「識做」咁叫班行會成員改由另一車閘進入，結果途經示威區接請願信嘅行會成員寥寥可數，令示威者反而少咗表達意見同曝光嘅機會。
但最激氣嘅應該係畀保釣殃及池魚嘅同場示威人士，有示威者等極都唔見行會成員，嬲嬲哋就開始失控，公開質疑其他示威者嘅訴求。例如有人無端端向中港家庭權益會「挑機」，話佢哋中港通婚一早就預咗冇床位生仔，中港家庭被踩到上心口，當然即刻叫陣回敬，互罵一輪。換言之，出位示威變咗得不償失。
保釣成員坐正喺特首辦車輛入口請願，反而見唔到班行會成員。