政壇：黎廣德反口參選工程界
選舉策略五花八門，估唔到連幾時正式報名參選都成為招數之一。今屆建制派喺功能界別內鬥，有啲界別有成五名建制派人士參選，泛民就係睇中呢點，諗住嚟個博大霧，好似泛民嘅衞星組織公共專業聯盟，尋日就唔聲唔聲派出三人報名參選。其中出選工程界嘅公文袋黎廣德仲要懶神秘咁，報完名後繼續封口，係都要等到夠鐘截止報名後至開記者會講解詳情，擺明想收漁人之利，等班建制派鬥餐死再執雞。但黎廣德之前講過今屆唔會參選，今次咁樣反口，佢份人係點，相信選民好清楚。
再睇真啲，原來黎廣德唔係以公文袋名義去選，而係只用公共專業聯盟名義，唔通佢嫌公文袋嗰名太衰？雖然佢唔肯承認，但就好老實咁話，預計對手實會利用港珠澳大橋官司去攻擊佢，話佢阻撓基建發展，令業界冇工開喎。