政壇：金融服務界五人混戰

立法會金融服務界嘅議席畀「金勞詹」詹培忠雄霸多年，向來冇乜人同佢爭，就算有都係佢贏晒，正當大家都以為冇人同佢爭之際，無啦啦又爆出佢退選。唔知係「瘦田無人耕，耕開有人爭」抑或想執死雞，即刻引發五人大混戰，仲成為功能組別中競爭最激烈嘅界別，唔知金勞詹有冇後悔當初退選，冇得測試自己嘅實力呢？

張華峯李君豪大熱

喺金勞詹未退選之前，亨達集團主席鄧予立已率先宣布參選挑戰佢，大家已預計有好戲睇，勢估唔到金勞詹退選後，呢套戲愈嚟愈刺激。繼前日有全國政協委員、恒豐證券董事總經理張華峯報名，諗住繼承金勞詹嗰位後，尋日截止提名前再有三位業界人士加入戰團，分別係港交所董事李君豪、有泛民背景嘅企業融資董事甄文星，同證券及期貨工會會長林德明，泛民同建制都有，可以話七國咁亂。

先講林德明，佢個會同工聯會有密切關係，但佢尋日打死都唔肯認自己係工聯會嘅人，仲話自己企開工人嗰邊，如果要得到班證券公司老細嘅票，都唔係咁易，但其實如果唔係覺得有機會，又點會出嚟陪跑？泛民甄文星就仲搞笑，以往佢就算參加選舉都係去會計界，但今次無啦啦空降金融服務界，佢解釋自己一直做開呢行，只不過冇人知。

尋日喺截止前報名嘅李君豪話本來都唔諗住玩，係金勞詹突然退下火線至考慮入呢個熱廚房，既然報得名，就有一定信心，仲話金勞詹早兩日都有打電話畀佢傾偈，睇嚟佢哋好老友。照咁睇，似乎雖然係大混戰，但都係張華峯同李君豪之爭o架喇。