私院地皮變雞肋 醫療產業純吹水

醜婦終須見家翁，黃竹坑同大埔兩幅私家醫院用地尋日截標，市場反應麻麻，再有本地財團同大學打退堂鼓，所謂醫療產業，到頭來可能又係吹水唔抹嘴。

食物及衞生局仲死撐，話招標嘅兩幅地都接獲標書，顯示市場對發展私營醫院有興趣喎。冇錯，係就係有人入標，弊在包括中文大學在內嘅多個原先有興趣嘅財團，因為標書條款「太辣」，煞車放棄競逐。

香港最珍貴嘅土地資源居然淪為食之無味、棄之可惜嘅雞肋，本地財團反應冷淡，反而吸引印度及新加坡醫療集團入標，講起真係諷刺。話時話，當局要求新建私院保證優先服務港人，海外財團點解會有興趣，好多人都覺得莫名其妙。

在商言商，醫療產業同其他產業冇乜分別，最緊要有利可圖，否則，就算地皮唔使錢都係假。當局呢頭撥地起私院，發展醫療產業，嗰頭又提出苛刻嘅投地條件，包括確保本地病人比例佔整體病人一半以上等，九唔搭八，梗係嚇怕財團喇。

正如有業內人士話齋，地產商賣樓係人都買得，偏偏私家醫院睇病要限對象，分明係大細超啫。前朝曾蔭權政府好高騖遠，大搞醫療產業，自己攞晒彩，要私院投資者捱義氣，係人都縮沙喇，叮！

商人無利不趕早，蝕本生意冇人做。當初多個本地財團對入標發展私家醫院磨拳擦掌，躍躍欲試，完全係睇中雙非孕婦來港產子呢盤大生意。由於當局大開綠燈，來者不拒，內地產婦不斷湧入，私院生意源源不絕，簡直係豬籠入水，想窮都難。點知特區政府改朝換代，新特首梁振英提前出招喝停雙非孕婦，私院即時斷咗財路。如果家陣斥資起私家醫院，分分鐘有去無回，條數計唔掂，仲唔褪軚咩。

講起雙非問題，真係唔講尤自可，一講把鬼火。煲呔曾上台嗰陣，問題已經開始浮現，佢咁多年來一直視若無睹，對內地孕婦逼爆產房，公立醫院不堪負荷無動於衷，反而盲目吹噓所謂醫療產業，卒之搞到亂晒大龍，令問題一發不可收拾。

嗱，新政府要撥亂反正，就應該檢討假大空嘅醫療產業，就算要起私家醫院，首先都要搞掂公共醫療先喇，係咪！