政壇：政商定格：Rick Chin教浙聯青委化靚妝
江浙向來盛產美女，星級化妝師Rick Chin前晚現身灣仔會所餐廳「浙江軒」，為浙江省同鄉會聯合會（浙聯）青委一班俊男美女講授扮靚心得，點解佢會專登現身教路？因為阿Rick都係浙江人，佢嘅合夥人亦係浙江二代詹氏姊妹花，即香港台州同鄉會名譽會長詹榮良嘅寶貝女兒，當日詹家大姊嘉莉及老二嘉儀都喺度。
阿Rick幫過梅艷芳、張國榮、張栢芝等明星化妝，近年已好少親自出手，只係每個月去一次老人院，為公公婆婆化個靚妝，事關好多老人家去到過身一刻，都未試過以靚妝影靚相。
Rick Chin（左二）及詹家姊妹花嘉莉（右二）、嘉儀（右一）齊為姐妹扮靚，左一為浙青前主席陸雅儀。
浙青主席車弘健太太王曉樺（左）都趁機向大師Rick（右二）請教。