政壇：搞搞政：麥美娟等緊CY做媒人

本港兩性失衡，城中未婚女子愈來愈多，做咗十九年區議員嘅工聯會立法會新界西參選人麥美娟（Alice）已經四十一歲，至今仍係小姑獨處。早排特首梁振英（CY）落區時，就同佢講到盛女嘅問題，當時CY仲應承介紹五個男仔畀佢識，據講呢個承諾至今都未兌現呀！

Alice尋日笑言，CY忘記冇所謂，只要佢記得研究為標準工時立法就得喇！Alice將爭取勞工權益擺喺兒女私情之前，算唔算為勝選而犧牲呢？但Alice特別強調，雖然自己已四張嘢，但仍然保養得宜咁話，係咁Keep住啱o架喇！

講到今次選舉，Alice揀咗紅、白、藍三色做競選顏色，佢話白同藍代表藍領同白領，凸顯佢哋除咗基層工友外，亦會為白領階層打工仔服務喎。至於紅色，就寓意佢作風夠辣，風格夠晒硬淨。參選新界西嘅名單仲有譚耀宗、陳恒鑌、梁志祥、郭家麒、麥業成、田北辰、梁耀忠、李永達、陳樹英、陳強、陳偉業、李卓人、何君堯、曾健成、陳一華。