政壇：民協驚四大皆空退選兩區

九月立法會選舉，民協早排宣布改派馮檢基轉戰超級區議會議席，同時殺入九龍東同新界西，連同老巢九龍西，希望打破立法會咁多年只得一席嘅宿命。點知民協尋日突然宣布退選九龍東同新界西，只係留守九龍西及力保超級議席，尋日臨時召開嘅記者會現場懸掛住「團結泛民 力爭廿四」嘅字樣，唔通呢個就係民協縮沙，等民主黨（白鴿黨）同公民黨（公文袋）成為最大得益者嘅原因？

民協宣布，KK同副主席譚國僑繼續領軍出選超級議席及九龍西直選，原本參選九龍東嘅許錦成及新界西嘅廖成利（老虎仔）就會退選。KK解釋，因為留意到泛民主派選情嚴峻，為咗力保泛民喺立法會有廿四席嘅否決權，所以決定變陣，仲話為咗保廿四席「民協願意做火鳳凰。」

大義凜然嘅宣告之下，一大原因其實都係驚輸，事關KK棄選九龍西而轉戰超級議席已經好冒險，譚國僑又唔爭氣，支持度一直都偏低，搞到老虎仔要回巢幫譚國僑抬轎。不過，民協變陣後，出選九龍東同新界西嘅泛民黨派有好大得益。KK都話，民協喺地區攞到萬零票一啲都唔奇，仲話好願意喺九龍東同新界西為社民連同白鴿黨助選添。呢頭有公文袋堅拒支持黨員司馬文參選，嗰頭又有民協收番地區名單，三個泛民政黨冇搞「地下情」，講都冇人信噃！