政壇：子女放洋扯到國民教育 張震遠楊哲安大反擊

城中熱烈討論港府欲推行嘅國民教育，反對陣營有唔少針對官員嘅言論，其中包括每逢教育問題就會畀人拎出來祭旗嘅高官子女大都放洋讀書。今次又有人認為，點解高官唔留子女喺香港讀書、接受國民教育呀？行政會議成員張震遠同喺上屆政府有份處理國民教育事務嘅前教育局長政治助理楊哲安，尋日不約而同咬住呢一點大反擊，為送子女去海外讀書嘅人平反。

張震遠有兩仔一女，大仔今年已經二十三歲，細仔十九歲，個女都唔細。佢嘅大仔係美國加州Claremont Mckenna College嘅高材生，呢間美國著名嘅文理學院，為當地商界、公共行政及政治界出產咗唔少領袖。近排啲批評指摘高官送子女去外國讀書，另一邊廂就喺本地主流學校推行國民教育。張震遠話，呢種批評好唔公道，事實上高官嘅子女大都已經中學畢業，佢哋亦唔係本地學校推行國民教育嘅政策考慮。

反映中產心聲

教育局前局長政治助理楊哲安任內都有份處理國民教育科，佢尋日喺電台節目亦反擊呢種說法。楊哲安兩個囡囡仲好細，有排都唔會放洋留學，但佢本身係留學歸來嘅，楊哲安話，子女離開父母去外地讀書，係學習獨立嘅好機會，每個家庭都會視乎自己嘅情況決定送唔送子女去海外或內地升學。作為父親，佢絕唔會單純為咗國民教育一科而考慮送唔送子女去外國讀書囉。

其實，本港每年有數以千計甚至萬計家庭送子女去外國讀書，首先考慮嘅條件都係經濟負唔負擔得到、仔女可唔可以適應，甚至有啲係因為香港升讀大學有困難等，單純將送子女去外國讀書聯想到一啲所謂政治爭議，實在好反智。張震遠同楊哲安嘅反擊之言，其實反映咗唔少中產家庭嘅心聲。