接二連三風化案 旺角淪為高危地

旺角不夜天係香港繁榮嘅標誌，但近排區內接連爆發風化案，淫賊如入無人之境，昔日嘅不夜天愈夜愈美麗，今日嘅不夜天愈夜愈恐怖，問你驚未！

呢，日前之嘛，旺角又發生連環非禮及強姦案。先有夜店小姐收工離開時，被色魔拖到大廈後巷施暴，再有帶醉歸家夜店「拳手」，被色魔跟蹤至舊樓梯間，用毛巾掩鼻非禮，事主反抗，色魔逃去。

兩處案發地點距離只有百幾米，色魔簡直係淫膽包天。有區議員對近期接連發生風化案感到驚訝，猜測色魔可能係區外人。話時話，旺角黃色架步多，「三無」唐樓多，確實好易引人犯罪。

本報記者連夜巡視發現，區內可以講係危機四伏，夜歸婦女防不勝防。嗱，旺角雖然好旺，可惜處處陷阱，就以西洋菜街同砵蘭街為例，入夜後燈火通明，但一街之隔嘅廣東道同渡船街幾乎見唔到人，最恐怖就係，附近有好多無大閘、無保安、無法團嘅「三無」唐樓，唔少天台互通，色魔可以輕易得手及逃脫。加上後巷人迹罕見，既冇閉路電視，更睇唔到看更巡邏，簡直係一步一驚心。

仲有一個陷阱好容易被忽視，就係廣東道一帶嘅露天排檔嘞。檔口同檔口之間有條約一米闊嘅通道，係好多居民出入必經之路，色魔入黑後匿喺入面伺機施襲，根本防不勝防。保安黑點處處，弊在好多地方都冇裝閉路電視，就算有亦只係對住娛樂場所正門外街道，後巷呢啲「被遺忘角落」成咗色魔作案嘅天堂。

查實，「三無」唐樓一直係旺角安全死角，前兩年「鏹彈狂徒」肆虐，市民要求改善同監管呢類樓宇治安嘅呼聲不斷，但當局拖得就拖，拖吓拖吓就冇咗件事。

講到尾，旺角呢塊香港旅遊業嘅生招牌，居然淪為風化案高危區，變成香港嘅瘡疤，簡直丟架。唔該警方快快做嘢，就好似日前喺蘭桂坊對付迷姦黨咁，除咗全力打擊風化案，更要徹底改善區內治安。咪話太一叮唔提醒，舊年因為花園街奪命大火，香港喺中國最安全城市排名三十強不入，如果治安繼續惡化，遲早包尾都似，叮！