政壇：政商定格：孫穎百部鋼琴山區送暖
話說一個內地山區嘅音樂神童，因家貧買唔起鋼琴，每次喺電視上觀賞別人彈琴，然後自己用紙板製成琴鍵，憑空想像美妙嘅音符，有次膽粗粗參加音樂比賽，估唔到一鳴驚人。「鋼琴公主」孫穎喺電視上目睹呢一幕，心情萬分激動。
佢慨嘆時下唔少富家子弟不滿足於窮奢極侈嘅生活，反而生活簡單嘅山區小孩，更懂得珍惜音樂帶來嘅快樂，所以佢同鋼琴大師兼師傅劉詩昆成立嘅慈善基金，月前決定發起送鋼琴行動，年底將同幾百位義工將一百部鋼琴、DVD機同電視送去廣東省山區嘅貧窮學校，並計劃資助才華洋溢嘅窮學生進修音樂。
