政壇：事旦男露真面目博當選
喺三年前嘅六四晚會上一舉成名嘅「事旦男」，多年來戴住口罩，尋日佢終於肯揭開神秘面紗露出真面目。真名叫何家泰嘅事旦男話，脫下口罩絕對唔係為咗博上鏡，而係想利用知名度收集足夠提名，參加九月立法會港島區直選，狙擊當年唔肯參與「五區公投」嘅白鴿黨。
何家泰尋日帶同當年高舉嘅「無綫新聞，事事旦旦」嘅紙牌，力證自己係如假包換嘅正牌貨「事旦男」。佢又話雖然唔多鍾意畀外界指指點點，但為咗參選，惟有把心一橫除下口罩。
佢不斷強調今次係「終極一脫」，如果咁都唔可以爭取到參選入場券，佢惟有轉趨低調淡出政圈喎！
