SUN熱辣：為大佬賣命 搵笨咩！

以為加入黑幫社團跟大佬就是義字行頭，可呼風喚雨？兩名曾跟大佬的少年親述由加入至脫離黑幫經歷，撕破黑幫兩肋插刀的假象。昔日甘為社團做打手，打生打死，一次失手被打爆頭，徘徊生死邊緣，大佬兄弟全置之不顧；落力參與「晒馬」的中堅分子，以為有朝可食「大茶飯」，豈料冒險犯案，竟連「飯盒都無一個」。可悲又可笑的遭遇，值得時下青少年借鑑。

個案一 阿文：受傷入院兄弟冇影

"專打關節位，次次對方都傷。嗰時一係唔做，一做就做到最好！"

「細個寸嘴，成日畀人問你邊瓣，靠有背景嘅朋友響朵照住，但我唔想吓吓靠人，於是直接搵大佬同佢講我想跟佢，佢OK，就入咗會，無特別儀式。」現年二十多歲的阿文（化名），為了不想欠人情，十五歲讀中二時自願入會。他說：「爭錢可以還，爭人情一世都還唔晒！」

外表黑黑實實的他，曾活躍於屯門黑幫組織，學過泰拳跟詠春，入會後充當打手，一個月至少打兩次交：「專打關節位，次次對方都傷。嗰時一係唔做，一做就做到最好！」因他好「打得」，漸打出名堂：「可能成日贏，個心好『雄』，兄弟有事一定幫，平日又暴躁，一唔妥對方，就會用左手叉住佢條頸，同佢講『信唔信我挖你對眼出嚟』，『拉弓車佢兩巴』，摑到佢哋暈陀陀。」

他義字行頭，心甘命抵為兄弟出頭，豈料險賠上性命：「有次老竇生日，兄弟畀人打叫幫手，我一放低電話就衝出去。點知去到見有差佬，大家匿上樓，一落樓就撞到對家。嗰時我哋散開避差佬，得番五個人，對方就有十幾個。畀人係咁打個頭打到休克，瞓咗一個月醫院，醫生話遲多五分鐘我就失血死，依家後腦摸落都一面凹一面凸。」

甘為兄弟賣命，原來在生死邊緣，卻不會共患難。阿文感慨：「入院咁耐，大佬、兄弟無嚟探我，係一個都無！我話晒係佢條，兄弟有事次次瞓身幫手，點可以咁？反而阿爸阿媽日日探我，幫我抹身，我以前以為屋企人唔鍾意我，點知我有事都係佢哋照顧我。」出院後，阿文決定脫會：「同大佬講，唔跟佢，佢都無留我，大家心照啦。」

回望過去的黑幫歲月，阿文嘴角翹一翹：「都係得啖笑，好彩無留案底。」他亦洗心革面：「依家我返地盤做番正行，重新嚟過。見到以前大佬，大家咪當唔識。有次仲撞番打我嗰『親家』，好想打佢，但諗到無謂因為呢啲人令屋企擔心，忍咗佢就算。」他更看清黑幫騙人真相：「細個要威要型，畀人打想有人出頭，大佬口口聲聲話幫你搞掂，但有無做無人知，係細路先咁純情，人講你就信。大佬咪又係，大茶飯分錢有你份咩？頂多讚你一句叻仔。賣命？搵笨咩！」

個案二 揚仔：吹雞吶喊唔知為乜

"以為加入黑社會好型，點知好似傻仔咁跟出跟入，唔通以後都係咁？"

同樣因為貪威響朵、得到「大佬」照應而加入黑社會的，還有現年十七歲的揚仔（化名）。回想十五歲那年，他與另一友人在朋友介紹下，加入黑幫，順利躋身成為社團一員。

當時該社團甚具勢力，天水圍亦是其盤據的地盤之一，不愁缺人，收更毋須威逼利誘：「仲使咩去公園球場收，淨係靠啲friend 搭friend介紹，都夠人！」

一心以為加入社團可「食大茶飯」，豈料入會一年多，他們成為落力參與「晒馬」的中堅分子，每次大佬「吹雞」，屬「嘍囉」級別的揚仔都會出力支持，「幫手計多個人頭」，但永遠只有在旁吶喊助威的戲份。當中最「具規模」的行動，要算是他們由天水圍「踩入」元朗，但揚仔至今對該次行動目的、流程仍一無所知：「大佬叫到咪去囉，有私家車接我哋去元朗一個屋邨，但為咗爭咩，我到依家都唔知o架！」

但他就記得車上放有大批武器，「有木棍、鐵通，不同款式嘅刀，任君選擇」，該次械鬥極具江湖電影中的打鬥陣容，雙方人馬多達六十人，揚仔手持木棍站在最後方叫囂。但現實終歸現實，兩幫人只是維持對峙僵局：「又叫又嘈差唔多成個鐘，話打又唔係打，兩班人都唔知做乜！」

該次落力到元朗「晒馬」究竟為社團爭取到甚麼？揚仔不知道，只知道虛耗了整個晚上，竟連車馬費，甚至是一個「老臨」飯盒都「換取」不到。就算揚仔逢「吹雞」必到，不斷的「晒馬」亦只是換來微薄的報酬︰「有時大佬會叫我去飲酒，就會畀幾百蚊我。」

「以為加入黑社會好型，點知好似傻仔咁跟出跟入，唔通以後都係咁？」要威無威，要錢無錢，入會一年多後的他，在朋友好言相勸下終於一場江湖夢醒過來，決定退出。

現時他與友人都有正當職業，回想從前，慨嘆當時年少無知：「諗番都覺得自己戇居，成個傻仔咁行行企企，勁無聊，嘥晒啲時間！」眼看區內黑青依舊在他流連過的地方叫喊，作威作福，今日的他卻有另一番體會，亦告誡其他青少年︰「有人叫你入（黑社）會，走，唔好理佢，再唔係就報警。」