政壇：搞搞政：政制局踢爆泛民選舉造謠

立法會選舉如箭在弦，有實事唔做、只識炒作政治議題嘅泛民主派，最近又胡亂發炮撈政治油水。白鴿仔近日炮轟政制及內地事務局嘅選舉宣傳不足，尤其係冇講清楚超級區議會議席嘅投票方法，影響市民投票意欲，要求譚志源落台。

但事實勝於雄辯，有政制局中人就寸爆泛民夾硬搵嘢嚟鬧，重提泛民舊年已鬧政府冇宣傳區議會選舉，但結果投票率高達四成一，仲高過上一屆選舉，創新高，泛民輸到一仆一碌，引證泛民輸咗賴地硬。

據聞，政府已準備咗一系列立法會選舉嘅宣傳計劃，打算喺提名期結束後開動。由於新增超級區議會議席，選民一人有兩票，一票投直選，另一票就投超級區議會議席，據聞當局會以幼稚園學生都識嘅數學題「1+1=2」，嚟宣傳一人兩票嘅概念，同時亦會首次喺多項官方宣傳品中，為冗長又難明嘅「立法會區議會（第二）功能界別議席」名稱旁邊，加設俗稱「超級議席」嘅字眼，以便候選人宣傳同避免選民投錯票。