政壇：食神訪陸羽鑽研懷舊菜
食評達人Isaac劉彬日前去咗陸羽茶室，同中菜部總廚禤智明及少東之一Tony陳定漢齊齊翻出近四十年前嘅手寫菜單，大談懷舊粵菜同陸羽嘅歷史。
禤師傅即場炮製「古法糯米雞」，佢話原隻鮮雞起骨極考功夫，再以低溫炸二十分鐘，皮脆糯米香。佢憶述三十年前曾被食客考起，要佢做隻名副其實嘅「糯米雞」，於是佢鑽研咗呢道佳餚。全港獨有嘅「網油鯪魚卷」係Isaac至愛，以豬網油包住鮮打鯪魚肉炸至金黃色，酥香不膩。
講起陸羽茶室，唔少家族五代同堂咁幫襯，充滿人情味。正當大家以為陸羽茶客大多數都係長者，Tony就話原來百分之九十都係年輕人，真係估佢唔到。
劉彬（左起）、陳定漢同禤智明都係識飲識食之人，坐埋即暢談食經。
一九七三年嘅陸羽茶室手寫菜單，代代相傳。
「古法糯米雞」製法好考功夫，製作時外皮一穿就要報銷。