前朝遺禍蘭桂坊 警方滅罪莫失威

毛澤東話：「掃帚不到，灰塵照例不會自己跑掉。」真係冇講錯。嗱，罪惡剋星終於發威喇！警方再洗太平地，反轉蘭桂坊，鐵腕掃蕩黃偷毒搶。

《太陽報》及《東方日報》連日獨家踢爆蘭桂坊淪為藏污納垢犯罪天堂之後，警方隨即展開代號OMEGA嘅大規模反罪惡行動，連續兩晚出動反黑組、牌照科、巡邏小隊同機動部隊等多個部門半百警員，巡查區內娛樂場所，重點針對被視為罪惡溫床嘅樓上酒吧。有消息話，倫敦奧運開幕之後，警方仲會將行動進一步升級。

除惡務盡，滅罪要快，今次警方對治安問題迅速回應，主動出擊，同以往唔踢唔郁、雷聲大雨點小做法差天共地，體現咗新政府「民生無小事」嘅新作風，順應民意，從善如流，令市民刮目相看。

蘭桂坊燈紅酒綠，華洋混雜，唔少海內外遊客慕名而來，務求盡興而歸。不過咁，由於前朝政府放任自流，滅罪不力，區內近年南亞裔及非洲裔非法勞工氾濫成災，「國際蒲點」已經淪為百害俱全、生人勿近嘅九反之地。

有犯罪集團趁蘭桂坊七國咁亂分一杯羹，利用「外籍僱傭兵團」收陀地、販毒甚至賣淫。呢，近排一種藥效特強、無色無味、俗稱「炸彈」嘅超級迷姦水已經入侵夜蒲勝地。黃偷毒搶乜都齊，迷亂醉娃通街走，老蘭呢塊香港生招牌，已經變咗香港瘡疤。

蘭桂坊今不如昔係本港社會亂象叢生嘅縮影。痛心特首曾蔭權一味同富豪勾勾搭搭，黐飲黐食，對民間疾苦不聞不問，對治安惡化闊佬懶理，搞到非禮案、強姦案、街頭追斬案、吸毒索K事件層出不窮。香港舊年喺中國最安全城市排行榜連前三十名都入唔到，你話市民邊度仲有安全感吖，叮！

雖然煲呔曾七年劣政已經成為歷史，但留低包括治安惡化在內嘅一堆蘇州屎仲繼續禍港殃民。嗱嗱嗱，繼早排旺角兩名「夜之女」一粒鐘內先後遭強姦及非禮之後，老蘭又有夜蒲女子畀人喺酒內落迷姦藥，帶到旺角賓館劫財劫色。呢頭警方掃蕩，嗰頭色魔犯案，真係夠晒沙膽。

警方鐵腕滅罪，等於警告牛鬼蛇神：差人做嘢嘞！打擊犯罪唔能夠手軟，更唔可以有頭威冇尾陣。警方要再接再厲，鞏固戰果，重建「亞洲最佳警隊」聲譽，千祈咪再失威呀！