政壇：政商定格：洪為民出書會颱風攔門
颱風韋森特來襲，天文台尋日傍晚急急掛八號波，本來人山人海嘅書展亦被迫提早收檔。菁英會榮譽主席Witman洪為民揀正尋日為新書《公義為民》開發布會亦一度好狼狽，事關唔少捧場嘉賓被卡喺入場人龍內，動彈不得，有份上台講嘢嘅Roundtable Community總幹事林輝亦被困四十五分鐘，搞到遲晒大到，一度令Witman急如熱鍋上嘅螞蟻，不停打電話教佢走捷徑，另選其他入口進場。
Witman好感慨咁話，今年書展「獨沽幾味」，只有惡搞同嬉笑怒罵嘅書至會大賣，一啲深入探討社會問題嘅新書，想搵本都難喎！
洪為民（右）出新書，施榮懷（左）冒雨到賀，而洪綺敏（中）就擔任嘉賓主持。