政壇：浙大校長兩岸論壇打機
仲記得行政會議成員李國章擔任教育統籌局局長時，曾經喺立法會會議上用電子手帳玩「鑽石方塊」遊戲，結果畀學生話佢唔尊重議會，點知類似事件日前又再上演。
話說南京大學日前舉行「海峽兩岸暨港澳地區大學校長論壇」，應邀出席嘅包括台灣、內地、澳門同本港共四十幾個大學校長，交流吓點樣去弘揚中華文化同加強大學之間嘅教育合作。
就喺香港城市大學前校長張信剛演講時，內地浙江大學校長竟然喺台下用手提電腦玩啤牌遊戲，仲畀人影咗相，有網民就喺微博貼咗張相，呢篇名為「教育不行、玩牌在行——浙大校長開會玩牌」嘅博文喺微博迅速畀人轉發超過一萬三千次。唔知浙江大學嘅學生見到之後會點睇呢？